دا اول بوست فالبلوج هنا و انا كنت بفكر اخليها باللإنجليزي بس لما فكرت تاني قولت ان الزائر وهو داخل المفروض انه داخل على بلوج واحد مصري فالمفروض يلاقيها بالعربي فقولت اخليها بالعربي احسن
المهم.. الفترة اللي فاتت كان بيجيلي اسئلة كتير من الناس اول ما كانو بيشوفوا عالديسكورد او على موقعي اني بدير شبكة AS207740
ايه الرقم دا بقى و ايه لزمتو؟ هحكيلك كل حاجة دلوقتي بالتفصيل الممل
بس قبل ما اشرح انا محتاج اعرفك على شوية مفاهيم لازم تبقى عارفها عشان تبقى قادر تفهم المصطلحات اللي موجودة في المقالة دي عشان منتوهش من بعض
اولًا العالم متقسم منظمات اسمها Regional Internet Registry (RIR) او بالعربي سجل الإنترنت الإقليمي.. المنظمات دي هي اللي بتشرف على تسجيل وتعيين الأيبيهات وال ASNs وهنعرف معنى الكلام ده دلوقتي
عندنا في العالم 6 منظمات كل منظمة منهم بتشرف على القارة بتاعتها.. و دي صورة بتوضح الكلام ده:
كل منظمة منهم بيبقى ليهم مجموعة من ال IPv4 و IPv6 وال ASNs اللي بيوزعوا منهم على الاعضاء بتوعهم
على سبيل المثال شركات النت بتكلم المنظمة اللي بتدير القارة اللي هم فيها مثلًا شركة فودافون بريطانيا بتكلم المسجل الإقليمي الأوروبي (RIPE) و بتقوله انهم عايزين يشتركوا معاهم
طبعًا كل منظمة وليها الاسعار والقوانين بتاعتها.. ف انت كشخص او كشركة بتقدم وبتدفع الاشتراك السنوي و بكده انت بقيت عضو عندهم العضو ده بقى اسمه Local Internet Registry (LIR) او بالعربي سجل الإنترنت المحلي
العضوية دي في المسجل الإقليمي الأوروبي (RIPE) مثلًا بتديك التالي:
/24 IPv4 (256 IPv4)
/29 IPv6 (633,825,300,114,114,000,000,000,000,000 IPv6)
ايه هي ال ASN؟
دي المعرف الخاص بالشبكة بتاعتك و بتكون مكونة من رقم واحد حتى 6 ارقام وكل شبكة بيكون ليها رقم فريد خاص بيها هي فقط و مش بيشاركها فيه حد تاني,
على سبيل المثال لو جيت تشوف 207740 هيقولك دي شبكة يوسف حامد و هيجيلك معلومات عن الشبكة بتاعتي
ايه هو ال IPv4؟
معناه بروتوكول الإنترنت الإصدار الرابع و ده ببساطة عنوانك على شبكة الإنترنت وبيكون بيتضمن شوية معلومات بسيطة عنك زي اسم شركة النت بتاعتك و دولتك و مدينتك, بالظبط زي الاصدار السادس
ايه هو ال IPv6؟
هو بروتوكول الإنترنت الإصدار السادس بس الفرق بينه وبين الرابع انهم ابتدوا يستخدموا الإصدار الرابع زمان فالتمانينات بعد بداية صنع الكمبيوترات, و ساعتها الدنيا مكانتش متطورة زي دلوقتي و عدد الاجهزة المتصلة بالإنترنت كانت معدودة على الصوابع
انما دلوقتي احنا عندنا شركات نت و سيرفرات و شبكات توصيل محتوى الخ… فبالتالي بحكم صغر ال IPv4 (ما يقارب ل 4.3 مليار أي بي إصدار رابع) مبقاش يكفي الاحتياج الحالي بسبب زيادة عدد الأجهزة المتصلة بالإنترنت
و ده كان السبب انهم يعملوا إصدار جديد وهو الإصدار السادس بحيث انه يكون اكبر في الحجم من اخوه الإصدار الرابع اللي كان 4 خانات بس و الارقام من 0 لحد 255 اما في الإصدار السادس بقى بيتضمن الارقام من 0 لحد 9 والحروف من A لحد F
مثال على الأيبيهات:
IPv6: 2a00:1450:4006:810:0000:0000:0000:200e
2a00:1450:4006:810::200e
مع العلم إن في الحالتين ال IP هو هو بالظبط متغيرش, الفرق إن احنا اختصرناه بسمن وظايف المسجل المحلي (LIR) انه يقدر:
- يطلب ASN بالنيابة عن شخص او منظمة (زي ما حصل معايا) ويحصل منهم رسوم اللي هتساعده يجدد العضوية السنوية بتاعته
- الأيبيهات اللي خدها من السجل الإقليمي (RIR) يقدر يبيع جزء منها او كلها مقابل رسوم بيحصلها من العميل برضو
طبعًا كل مسجل إقليمي (RIR) ليه القوانين والقواعد الخاصة بيه اللي المسجلين المحليين (LIR) لازم يحترموها يا اما الإقليمي بينهوا العقد معاهم والأيبيهات وال ASNs بترجع للإقليمي تاني مثلًا المسجل الاقليمي الأفريقي (AFRINIC) في أفريقيا عنده قانون بيقول إن المسجلين المحليين عنده لازم يستخدموا الأيبيهات داخل نطاق أفريقيا فقط, و متاح يطلب ASN في حالة انها لنفسه او للمنظمة بتاعته فقط و مينفعش يطلبها نيابة عن حد تاني عكس مثلًا السجل الأوروبي
ازاي دخلت مجال الشبكات و ازاي بدأ الموضوع؟
AS207740 هي شبكة على النت زي الشبكات بتاعة شركات الأتصالات زي شركة WE (المصرية للأتصالات) و فودافون الخ… بس الغرض من الشبكة بتاعتي تعليمي فقط مش تجاري
انا معايا الأيبيهات بتاعتي والترانزيت والراوترات, يعني بمعنى آخر ممكن تقول إن انا عندي شركة نت بأسمي بستخدمها في الدراسة والبحث والتجربة في مجال الشبكات والسيرفرات
الموضوع بدأ في 2019 لما صاحبي ريك (Rick) الهولندي كان بيتكلم عن الشبكات و الأيبيهات وما إلى ذلك ولقيت إن الموضوع مشوق ونال إعجابي, لحد يوم 2 ديسمبر 2019 لما قولت لــريك إني عايز ادخل المجال و محتاج ASN.. و برضو فرصة إن ريك كان بقاله فتره في المجال فبالتالي هيبقى قادر يساعدني إني ابدأ بحكم إن الجزء ده بالذات من الشبكات بيفتقر للكتب وبيعتمد اكتر على المعارف والتجربة العملية
وبالفعل قولتله و ابتدينا نمشي في الإجراءات القانونية بحكم إن ريك عضو في المسجل الاقليمي الاوروبي RIPE, و برضو نفس المسجل بيدير بعض المناطق في أفريقيا (ASN المصرية للأتصالات من RIPE) فبالتالي مكانش في اي مشاكل إني اسجل من الأوروبي بدل الأفريقي,
بعد كده بحكم إني مصري فكان لازم إثبات إن ليا وجود في أوروبا, والحل هنا كان إني اقدم فاتورة من سيرفر يكون في أوروبا
و بالفعل قدمت فاتورة السيرفر اللي انا جبتو عشان يبقى اول راوتر ليا وكان في فرانكفورت المانيا, بعد كده كان لازم اتنين يكونوا الترانزيت بتاعي بحيث إن لو واحد منهم وقع التاني يبقى احتياطي, مجرد object بنحتاجها اثناء التسجيل بس ريك قالي انا هبقى واحد, كده يبقى باقيلك واحد تاني, روحت كلمت صاحبي لوكاس الأماني اللي بالمناسبة كان معاه ASN من قبلي, قولتله إني هجيب ASN و سألته لو ينفع اخد منه ترانزيت وبالفعل وافق و على آخر النهار ريك كان باعت التيكيت لـ RIPE
تاني يوم لقيت ريك بيكلمني و بيقولي مبروك يا 207740
و بداية من يوم 3 ديسمبر 2019 بقيت رسميًا أول طالب مصري يكون معاه ASN
كده انا معايا ال ASN والراوتر والترانزيت.. و ريك كان مديني أي بي اصلًا من قبل ال ASN.. كده مبقاش فاضل غير إني اسطب الراوتر
ريك ساعدني في تسطيب الراوتر بحيث إني ابقى قادر اتعرف على الاعدادات المطلوبة وجبت ترانزيت كمان من شركة Hurricane Electric اكبر شركة ترانزيت في العالم وساعتها كانوا لسه بيقدموا ترانزيت عن طريق ال tunnel (حاليًا غير متاح) و بكده يبقى عندي 3 ترانزيت هم ريك و لوكاس و HE
ايه هو الترانزيت؟
بكل بساطة هو نفس فكرة ترانزيت الطيران,
يعني لو واحد في مصر عايز يروح ولاية سان فرانسيسكو في كاليفورنيا امريكا, بيحجز تذكرة والطيارة بتطلع من مطار القاهرة تهبط مثلًا في مطار ميونخ المانيا, بعد كده بيركب طيارة تانية بتطلع من مطار ميونخ تروح على سان فرانسيسكو, نفس الفكرة هنا.. لما تيجي تفتح موقع جوجل مثلًا النت بيخرج من الراوتر بيروح على ترانزيت اللي وظيفته انه يوصلك للجهة المطلوبة وهي موقع جوجل
ايه هو ال Tunnel؟
معناه النفق وده بيكون عبارة عن اتصال مباشر بيني وبين سيرفر تاني و ده البديل عن إني امد كابل من الراوتر عندي لشركة الترانزيت
المهم الموضوع وقف شوية بسبب الدراسة والحياة لحد ما ابتديت بقى اخوض التجربة بنفسي إني اجيب راوترات اكتر و اسطبهم و اربطهم ببعض بحيث إني أبني شبكة كبيرة مكونة من راوترات في دول كتير.. ومش كده وبس انا كمان ابتديت ادخل ال Internet Exchange Points (IXP) كمان اللي اسمها بالعربي نقطة تبادل الإنترنت
زي ما قولت إن عشان يبقى في اتصال مباشر بيني وبين شركة انا عملت نفق, وطبعًا النفق ده بيبقى مبني فوق النت بتاعك, فبالتالي لو النت بتاعك وقع فشبكتك هي كمان وقعت, والحل هنا كان إنهم يعملوا حاجة اسمها نقطة لتبادل الإنترنت
ايه هي نقطة تبادل الإنترنت (IXP)؟
نقطة التبادل دي بتبقى عبارة عن سويتش محطوط في مركز البيانات بحيث إن الشركات كلها تتجمع فيه و يبتدوا يتبادلوا الإنترنت عن طريق الأجهزة المخصصة لكده زي الراوترات والسويتشات.. وبحكم إنهم في نفس مركز البيانات فتكلفة مد الكابل بتبقى اقل بكتير, وبكده يبقى كل الشبكات اللي دخلت نفس نقطة التبادل ليها اتصال مباشر بينها وبين بعضها, والغرض من النقطة دي هي توفير تكلفة الترانزيت العالية وتكلفة مد الكابلات الأرضية والبحرية وصيانتها اللي بتكون مكلفة جدًا
بعد كده بدأت مشروع إني فتحت IXP خاص بيا وكان الاتصال بيه عن طريق النفق و وصل لأكتر من 60 مستخدم في دول كتير و اكتر من 200 جيجابايت في الشهر من البيانات المتبادلة
تطور الموضوع حاليًا إني فتحت BGP (البروتوكول المستخدم في تشغيل النت) على راوتر المايكروتيك عندي في البيت والترانزيت عن طريق نفق
والسبب اللي خلاني اعمل كده هو عدم توافر ال IPv6 في مصر, وبما إني عندي الإمكانيات و إن اساس شبكتي اصلًا هو البحث والاستكشاف والتعلم وبالفعل حاليًا لو اي حد لقط على الشبكة في البيت عندي هيبقى عندو IPv6 وشركة النت هتكون يوسف حامد :)
المجال ده عمومًا ساعدني بشكل كبير جدًا إني افهم حاجات كتير مكنتش اعرفها عن ازاي الإنترنت بيشتغل, طبعًا كله بفضل العلاقات اللي قدرت اكونها مع ناس كتيرة وكبيرة في المجال ده والموضوع فعلًا طلع كبير جدًا و اللي إحنا اتكلمنا فيه فوق دا كله مجرد نبذة بسيط جدًا ومختصرة عن جزء صغير جدًا من الشبكات وبدون التدخل في أي تفاصيل تكنيكية, لكن الأمر بيحكمه حاجات كتير جدًا منها الكابلات البحرية و عقود و اتفاقيات وقوانين دولية الخ..
وفي النهاية حابب اشكركم على قرائتكم للبوست ده.. ولو في أي اقتراح او إستفسار, لينكات التواصل معايا موجودة في الصفحة الرئيسية من البلوج دي
إلى ان القاكم في بوست آخر.. والسلام عليكم ورحمة الله تعالى وبركاته